එන්න... ලයික් කරලා මැජික් බලන්න...

මේ වගේ පෝස්ට් ඔයාලා හැමෝම ෆේස්බුක් එකේ දැකලා ඇතිනෙ. මැජික් එකක් බලන්න නම් මේක කොමෙන්ට් කරලා ලයික් කරන්න, හැක් වෙලාද බලන්න මේ පෝස්ට් එකට මෙහෙම කොමෙන්ට් කරන්න... කරල නැතත් අඩු ගානෙ දැකල හරි ඇතිනෙ...

අද අපි කියන්නෙ අන්න ඒ වගේ 'ෆේස්බුක් මැජික්' ගැන. මුලින්ම මම ඉතාම වගකීමෙන් කියනවා මේවා ටොම්පච. අලි බොරු. අපි ෆේස්බුක් එකට දාන ඕනම ඡායාරූපයක්, ෆොටෝ එකක්, ඉමේජ් එකක් සාමාන්‍ය JPEG / jpg ෆයිල් එකක් විදියට තමයි ෆේස්බුක් එකට අප්ලෝඩ් වෙන්නෙ. (තාක්ෂණික විදියට ඕන නම් ඒක කරන්නෙ php කෝඩ් වලින්.). අපි අප්ලෝඩ් කරන ඕනම ඉමේජ් එකක් jpg විදියට අප්ලෝඩ් වෙන්න තමයි ඒක හදාල තියෙන්නෙ. ඉතින්, ඔයාල මොන විදියට කොමෙන්ට් කලත්, ලයික් කරලා ෂෙයා කලත්, ඒ ඉමේජ් එක වෙනස් වෙන්නෙ නෑ. ඒක දැන් අප්ලෝඩ් වෙලා ඉවරයිනෙ ෆේස්බුක් සර්වර් වලට. ඒකත් ෆේස්බුක් එකේ තියෙන නිකන්ම නිකන් ෆොටෝ එකක් විතරයි ඒක අප්ලෝඩ් උනාට පස්සෙ. 

ඉතිං ඇයි  පේජ් ඇඩ්මින්ලා මෙහෙම ඒවා දාන්නෙ?

තියෙන එකම හේතුව එයාලගෙ පෝස්ට් වලට ලයික්ස්, කොමෙන්ට්ස් ගණන වැඩි කරගෙන, ඒ හරහා එයාලගෙ post reach එක, ඒ කියන්නෙ එයාලගෙ පේජ් එක හෝම්පේජ් නොටි‍ෆිකේෂන් (Home feed notifications) විදියට එන සාමාජිකයො ගණන වැඩිකරගන්න විතරයි. උන් කරන්නෙ උන්ගෙ පේජ් එක up කරගන්න ඔයාලව රවට්ටල ඔයාලව පාවිච්චි කරනවා. එච්චරයි.
මේ බලන්න, ඕක නොදන්න කී දෙනෙක් මේ වැඩේට අහු වෙනවද කියලා. 

 මේ බලන්න, මේ පෝස්ට් එකට එහෙම අහු වෙච්චි අය කීයක් ඉන්නවද කියල. රූපෙ උඩ ක්ලික් කරල බලන්නකො පෝස්ට් එක දිහාව.

දැන් ඔයාලම හිතල බලන්න නිකන්ම නිකන් ෆොටෝ එකකට ලයික් කරල D අකුර කොමෙන්ට් කලාම ඒක වෙනසක් වෙනවා කියාල් හිතන එක කොයි තරම් ප්‍රෝඩාවක්ද?

ඇයි මේ ෂෙයා කරන්න කියන්නෙ?

ෂෙයා කලාම ඔයාගෙ වෝල් එක ඒ පෝස්ට් එක තිබිලා ඔයාගෙ යාලුවොත් බලනවා. උනුත් කොමෙන්ට් කරලා ෂෙයා කරනවා. ඕක නිකන් ලෝක බෝලේ වගේ ඉවරයක් නැතුව ගිහින් අර පේජ් කාරයගෙ පෝස්ට් එකට ලක්ෂ ගණනක post reach එකක් එනවා.
ඔන්න ඕක කරගන්න තමයි උන් කියන්නෙ ෂෙයා කරන්නත් කියලා.

ටිකිරි මොලේ මාරයි නේද? විහිලුවට ගන්නෙපා. ඔය තියෙන ස්ක්‍රීන්ෂොට් එක බලන්න. ඒකෙ කොමෙන්ට් වලින් පේන්නෙ අහු වෙච්චි ගණන තමයි.

දැන් ඔයාලා තීරණේ කරන්න මාත් ආපහු මුන්ට අහු වෙනවද නැද්ද කියලා. කියාදීම අප සතු කාර්යයක් නමුත් වටහාගෙන පිළිපැදීම ඔබ සතුයි.

 කැමති නම්, පෝස්ට් එකට කොමෙන්ට් එකක් දාන්න. (ඔව් ඔව් මේ බ්ලොග් එකෙයි පේජ් එකෙයි post reach ගණනයි Likes ගණනයි වැඩි වෙනවට මාත් ආසයි තමා)

මා ඉතිං යන්න යනවා... මට යන්න අවසරයි...

සුබ දවසක් හැමෝටම. බුකියෙ ගොඩක් අය මගෙන් අහපු දෙයක් තමා කොහොමද ෆේස් බුක්  deactivate  කරන්නේ කියලා. ඉතින් එතකොට මම අහන්නෙ ඔයාට මොකද වෙන්න ඕන තාවකාලිකව අයින් වෙන්නද ඕන නැත්නම් ඩිලීට් කරලාම දාන්න ඕනද කියලයි.ඉතින් එතකොට එයාල කියන්නේ ඩිලීට් ම කරලා දාන්න පුලුවන්නම් හොදයි කරන්න පුලුවන්ද එහෙම කියලා. 

ෆේස්බුක් බාවිතා කරන අය ගොඩක් දෙනෙක් ස්ථීරවම  delete  කරන්න නොදැන හිටියත්  Mark  අයියා ඒ පහසුකමත් දීලා තියනවා.හැබැයි කාටවත් ලේසියෙන් හොයාගන්න බැරිවෙන්න හංගලා තමා තියෙන්නෙ. මම කියන්නේ බොරුවක් කියලා හිතනවානම් ඔයා ඔයාගේ  profile  එක අස්සක් මුල්ලක් නෑර බලන්න  Deactivate  එකට අමතරව කිසිම තැනක  Permanent Delete  කරන්න ක්‍රමයක් දීලා තියනවාද කියල. හොදයි අපි එහෙනම් වැඩේට බහිමු.

මොකද්ද එතකොට   Deactivate  එක සහ  Delete   කිරීම අතර වෙනස?

තියන ප්‍රධානතම වෙනස තමා   අපි  Facebook  එකේ පේන්න තියන  deactivate  ක්‍රියාවලිය කරොත් අපිට ඕනි දවසක ආයමත් අපේ  account  එකට කිසිම ප්‍රශ්නයක් නැතුව log  වෙන්න පුලුවන්. ඒ කියන්නේ  account  එක අපිට නැතිවෙන්නේ නැහැ. 

පොඩ්ඩක් නිදියගන්නවා වගේ වැඩක්. අත පය හෙලෙව්වෙ නැති උනාට ආපහු නැගිටින්න පුලුවන්. කොහොමත් නැගිටිනවනෙ. සමහරු නම් අත පයත් හොලවනවා. deactivate කරද්දි Opt Out කියන එකට ටික් එක දැම්මෙ නැත්නම් ඔයාට ආපහු එකවුන්ට් එක හදපු වෙලාවට අනිත් අයගෙන් Notification පවා එනවා.

හැබැයි අපි  Delete   කලොත් අපිට දවස් 14 ක් ගියාට පස්සෙ කිසිම දිනක ඒ  account  එක ගන්න බෑ. ඒ කියන්නේ   account  එක නැතිම වෙලා යනවා. කෙලින්ම බෙල්ල මිරිකලා දානවා හා සමානයි.

ඇයි දවස් 14 ක් ගියාට පස්සෙ නැතිවෙන්නෙ?

ආ ඒකත් මාර්ක් අයියගේ එක උපක්‍රමයක් තමා.දවස් 14ක් යනකම් වෙන්නෙ  account  එක  deactivate  වීමක්.15 වෙනි දවසේ තමා  automatically delete  වෙන්නෙ   account  එක.
හිතන්නකො මෙහෙම. ඔයා  account  එක   delete  කරන්න යන්නේ කාත් එක්ක හරි රණ්ඩු වෙලා ඒ තරහා නිසා කියලා.ඔන්න  delete  කරපු ගමන් නැති වෙලා ගියොත්   මාර්ක් අයියට එක  customer  කෙනෙක් නැති උනා වෙනවා. හැබැයි දවස් 14ක් යන්න කලින් ඔයාගේ ඒ තරහා හොදටම නිවිලා. ඒ වගේම තමා ගොඩක් දෙනෙක්ට  මූණත් එක්ක තරහ වෙලා නහය කපාගන්නවා වගේ deactivate කලාට ආය log වෙන්න හිතෙනවා. (සමුගත්තෙ මං සිතකින් නොවේ). ඉතින් ඒක නිසා තමා එහෙම කරලා තියෙන්නෙ. එතකොට මාර්ක් අයියට  customer  කෙනෙක් නැතිවෙන එක බොහෝ දුරට වැලකෙනවා. නමුත් දවස් 14 ක් යනකමුත්  log  උනේ නැහැ කියන්නේ ඇත්තටම එයාට  delete  කරන්න ඕනි වෙලා.ඉතින් අකමැත්තෙන් හෝ මාර්ක් අයියා ඔයාට යන්න අවසර දෙනවා.

හරි එහෙනම් අපි වැඩේ පටන් ගමු.මුලින්ම කියන්නම් තාවකාලිකව  Deactivate  කරන විදිය.

Settings → Security → Deactivate Your Account  කියන එකේ යටම තියන  Deactivate your account කියන එක  click  කරලා ඔයාගෙ  password  එක ගහන්න.
ඊට පස්සෙ Reason for leaving කියන එකෙන් ඔයා කැමති එකක් තෝරන්න. Please explain further කියන එකටත් ඔයාට හිතෙන ඕනම දෙයක් ගහන්න.
අන්තිමට Email opt out කියන එකට  tick mark  එකක් දානවනම් දාන්න. දැම්මෙ නැත්නම් වෙන්නෙ ඔයා  deactivate  කලත්  ඔයාගෙ  account  එකට සම්බන්ධ සමහර  emails email account  එකට එනවා.දැන්මොත් එහෙම  email  වත් එවන්නෙ නැහැ. ඔය ඔක්කොම හරිනම් අන්තිමට  deactivate  කියන එක ඔබන්න.ඊට පස්සෙ එන එකෙන් ආය  Deactivate Now  කියන එක ඔබන්න.

ඇයි  deactivate  කරන්න වෙන්නෙ?

හිතන්න ඔයා කරපු මොකක් හරි වැඩක් නිසා ඔයාව එක දිගට  report  කරනවා කට්ටිය.අන්න ඒ වගේ වෙලාවක ඔයා ටක්ගාල  deactivate   කරලා දන්න.දවසක් දෙකක් එහෙම්ම දාල තියන්න.ඔයාව  report  කරන්න කාටවත් බැහැ එතකොට. එහෙම නැත්නම් ඔයාගේ පෞද්ගලික කාරණාවක් වෙන්නත් පුලුවන්නෙ.ආය  ඔයාගෙ  account  එකෙන්ම එන්නත් ඕනි හැබැයි මාසයක් දෙකක් විතර  fb එන්නෙ නැතුව ඉන්නත් ඕන.හිතන්න  deactivate  කලේ නෑ කියලා. ඔයා   ආය එද්දි අනිත් අයගේ  tag, messages   වගේ දේවල් පිරිලා තියේවි ඔයාටත් එපා වෙන්නම.ඉතින් හුදකලා විරාමයේදි ටිකක් තනිවෙන්න හිතුනොත් එහෙම හොදම දේ  deactivate  කරන එක.

දැන් බලමු ස්ථීර වශයෙන්ම අයින් වෙන්නේ කොහොමද කියලා.

මේකනම් deactivate කරනවට වඩා ගොඩක් ලේසියි. කොහොමත් මැරෙන්න ලේසිලු ජීවත් වෙන්නලු අමාරු. කරන්න තියෙන්නෙ facebook.com/help/delete_account කියන ලින්ක් එකට ගිහින් ක්ලික් කරන එක.
එතකොට එන මේ බොක්ස් එකේ Delete My Account කියන බට්න් එක ඔබන්න.

ඊට පස්සෙ මාක් අයියා බලනවා මේ ඩිලීට් කරන්න හදන්නෙ ඔයාමද නැත්නම් රොබෝවෙක්ද කියලා. තමන්ගෙම එකවුන්ට් එක තමන්ම ඩිලීට් කරන එක අමුතුයිනෙ. ඔයාට පින්තූර ටිකක් ‍තෝරන්න දෙනවා. රෝස මල් තියෙන ෆොටෝ ක්ලික් කරන්න, සිංහයෝ ඉන්න ෆොටෝ ක්ලික් කරන්න, ඔරලෝසුවක් තියෙන ෆොටෝ ක්ලික් කරන්න... ඊට පස්සෙ ඔයාගෙ ෆේස්බුක් පාස්වර්ඩ් එකත් ගහන්න ඕන. ගහලා... යටින්ම තියෙන Delete My Account කියන බට්න් එක ඔබන්න.

ඊට පස්සෙ , ඔයාට මේ පාතින් තියෙනවා වගේ මැසේජ් එකක් එයි ඔයාගෙ එකවුන්ට් එක ඩිලීට් වෙන්න දැම්මා කියල. දවස් 14ක් ඇතුලත ආපහු ලොග් වෙලා ඩිලීට් වෙන්න දාපු එක කැන්සල් කලේ නැත්නම් එකවුන්ට් එකට බඩුම තමා...!
මතක තියාගන්න. මේ දවස් 14 ඇතුලත් ඔයාගෙ එකවුන්ට් එක කාටවත් පෙන්නන්නෙ නෑ.

ඔන්න ඕක තමයි ගොඩක් අයට තියෙන ප්‍රශ්නෙකට සම්පූර්ණ උත්තරේ. කොමෙන්ට් එකකුත් පහලින් දාලම යන්න හොඳේ.
(විශේෂ ස්තුතිය : Dilan Tharaka )

ෆේස්බුක් වීඩියෝ ඩවුන්ලෝඩ් කරනවද? එහෙනම් මේකත් බලන්න

ෆේස්බුක් යන අය හැමෝම ඉඳහිට හරි ෆේස්බුක් වීඩියෝත් 2ක් 3ක් හරි බලනවා ඇතිනෙ. ඒවා ඩවුන්ලෝඩ් කරන්න ට්‍රයි කරලා තියෙනවද? කොහොමද කලේ?
අද අපි කියන්න යන්නෙ, කිසිම ඩවුන්ලෝඩර් එකක් නැතුව, බොහොම ලේසියෙන්  ෆේස්බුක් එකේ තියෙන වීඩියෝ එකක් හරි (mp4 විදියට, ෆේස්බුක් වීඩියෝ mp4 තමයි) වීඩියෝ එක නැතුව ඒකේ ඕඩියෝ එක (mp3) විදියට හරි ඩවුන්ලෝඩ් කරගන්න හැටි. 

ෆේස්බුක් ඩවුන්ලෝඩ් කරන්න මොකටද ඩවුන්ලෝඩර්, නේද?

මුලින්ම කරන්න ඕන වීඩියෝ එක උඩ right click කරලා Show Video URL කියන එක සිලෙක්ට් කරන්න. එතකොට එන ලින්ක් එක සිලෙක්ට් කරලා වීඩියෝ ලින්ක් එක කොපි කරගන්න.
පලවෙනි කොටස ඔච්චරයි.

දැන් ඊළඟ කොටස. ෆේස්බුක් වීඩියෝ ඩවුන්ලෝඩ් කරන්න දෙන වෙබ් අඩවි ඉන්ටනෙට් එකේ තියෙනවා. ඒවට ගිහින් අපි අර කලින් කොපි කරගත්තු ලින්ක් එක paste කරලා download button එක එබුවම නිකන්ම ඩවුන්ලෝඩ් වෙනවා. කොච්චර ලේසිද.පහසුද. මේ පෙන්වන්න යන්නෙ ඒ විදියට පාවිච්චි කරන්න පුලුවන් ප්‍රධානම වෙබ් අඩවි 2ක්.

1. www.downloadvideosfrom.com

ඔය තියෙන්නෙ ඒක. ඔය ටෙක්ස්ට් බොක්ස් එකේ අර කොපි කරගත්තු ලින්ක් එක පේස්ට් කරලා ඔයා කැමති විදියට ඩවුන්ලෝඩ් කරගන්න ඔය බට්න් 3න් එකක් ඔබන්න. එතකොට ඔයාගෙ බ්‍රව්සර් එකේ සාමාන්‍යයෙන් වීඩියෝ ඩවුන්ලෝඩ් වෙන තැනට නිකන්ම ඩවුන්ලෝඩ් වෙනවා.
Download mp4 කියන්නෙ ඔරිජිනල් වීඩියෝ එක.
Download mp4 (HD) කියන්නෙ HD වීඩියෝ එකක් (720p) තමයි ඩවුන්ලෝඩ් වෙන්නෙ.

2. www.fbdown.net

 
මේකත් ඒ වගේම එකක්. හැබැයි පු‍තෝ මේකෙන් ඩවුන්ලෝඩ් කරද්දි ඔයාලගෙ බ්‍රව්සර් එකේ Ad-blocker එකක් ඉන්ස්ටෝල් කරලා තියෙනවා නම් ඒක disable කරලා ඉන්න ඕන. ඒ වගේම මේකේ audio විතරක් ඩවුන්ලෝඩ් කරන්න පහසුකමකුත් නෑ. කලින් එකේ නම් පුලුවන්නෙ.
මේකේ ලින්ක් එක paste කරලා download බට්න් එක එබුවාම මෙන්න මේ වගේ ඩවුන්ලෝඩ් පේජ් එකකට යනවා. කලින් වගේම නෝමල් වීඩියෝ එකද HD වීඩියෝ එකද කියලා එතනින් ‍තෝරන්න පුලුවන්.

පහලින් තියෙන්නෙ ads. උන්ට ඇඩ් ටික පෙන්නගන්න ඕන නිසා තමයි Ad-blocker disable කරන්න කියන්නෙ මුලින්. කලින් එකේ නම් එහෙම ප්‍රශ්නයක් නෑ.

දැන් බලන්න. කොච්චර ලේසිද? ඩවුන්ලෝඩර් හොය හොය ක්‍රැක් හොය හොය දඟලන්න ඕන නෑ. YouTube වීඩියෝ එහෙම නම් මීටත් වඩා ලේසියෙන් ඔන්ලයින් ඩවුන්ලෝඩ් කරන්න ක්‍රම තියෙනවා. අලුතෙන් යමක් ඔලුවට දාගත්තු අය කොමෙන්ට් එකක් දාන්නකෝ.

ෆේස්බුක් කවර් ෆොටෝ එකක් හදන හැටි.

ෆේස්බුක් කවර් ෆොටෝ කියන්නෙ මොකක්ද කියලා මම අමුතුවෙන් කියා දෙන්න ඕන නෑනෙ. අද මේ පෝස්ට් එකෙන් කියන්නෙ කොහොමද ලස්සන කවර් ෆොටෝ එකක් හදාගන්නෙ කියන එක. ඔයාලත් දැකලා ඇති සමහරුන්ගෙ කවර් ෆොටෝ වල කොටස් කැපිලා ගිහින්, ඇදිලා ගිහින්, අකුරු බොඳ වෙලා.... එහෙම වෙලා තියෙනවා. සමහරුන්ගෙ ඉතාම ලස්සන කවර් ෆොටෝ තියෙනවා. අන්න එහෙම එකක් අපේ ප්‍රොෆයිල් එකටත් දාගන්නෙ කොහොමද කියලයි මේ කියන්නෙ.
ක්‍රම 2ක් තියෙනවා.

1. වෙබ් සයිට් එකකින් ඩවුන්ලෝඩ් කරලා දාගන්න එක. ලස්සන ලස්සන කවර් ෆොටෝස් දෙන වෙබ් සයිට් ඕන තරම් තියෙනවා ඉන්ටනෙට් එකේ.
උදා: HD Fb cover, Trendy covers, Unique FB covers, HD nice

ඔවගෙන් ඔයාගෙ හිතට හරියන එකක් අරගෙන දාගන්න එක ලේසියි.

2. දෙවෙනි වැඩේ තමයි ටිකක් අමාරු. ඒ කියන්නෙ අපේ ෆොටෝ එකකින් හෝ අපි කරපු නිර්මාණයක් ෆේස්බුක් කවර් එකක් විදියට දාන එක. එහෙම කරන්න ගියාම තමයි සමහරුන්ගෙ උඩ නෑ...යට නෑ...ඇදිලා ගිහින්...බොඳ වෙලා... ඔහොම වෙන්නෙ.
එහෙම නොවෙන්න ලස්සන කවර් ෆොටෝ එකක් හදාගන්නෙ කොහොමද කියලා අපි බලමු දැන්.

මුලින්ම අපි කරන්න ඕන ග්‍රැ‍ෆික් ඩිසයින් හෝ ෆොටෝ එඩිටින්ග් ප්‍රෝග්‍රෑම් එකකින් කවර් ෆොටෝ එකේ සයිස් එකට ඩොකියුමන්ට් එකක් හදාගන්න ඕන.

මේක තමයි සයිස් එක. ප්‍රධාන වශයෙන්ම පරිගණකයකින් හෝ ලැප්ටොප් එකකින් බලන්න වගේ හදනවා නම් (ඒක තමයි ප්‍රොෆෙෂනල් විදිහ) document එක හදන්න ඕන පික්සල්ස් 851 x 315 කියන සයිස් එකට. (රූපයේ නිල්පාට ලොකු කො‍ටුව)
අපි ඒ සයිස් එකට ෆොටෝ එක හැදුවට අපිට පේන්නෙ ඔය කොළපාට කො‍ටුව ඇතුලෙ තියෙන ප්‍රමාණය විතරයි. ඒක පික්සල් 820ක් දිග 312ක් පළල ප්‍රමාණයක්. හතර පැත්තෙන් යම් ප්‍රමාණයක් border එක විදියට අහක යනවා. (නිල් පාටින් පේන ටික)
ඒ නිසා ඔයා ලෝගෝ එකක්, අකුරු ටිකක් දානවා නම් කොළපාට කො‍ටුවේ ප්‍රමාණය ඇතුලත විතරක් දාන්න ඕන.
අපි ඔහොම හැදුවම ඕක ෆෝන් වල බලද්දි දැපැත්තෙන් ටිකක් කැපිලා යනවා. ඒ නිසා හොඳම දේ තමයි දාන අකුරු සේරම පුලුවන් නම් නිර්මාණයේ මැද හරියෙන් දාන එක. 

කවර් ෆොටෝ එකක් හදලා ඔයා කෙලින්ම ටාගට් කරන්නෙ ෆෝන් වලින් බලන අය විතරයි නම්, පික්සල් 640 x 360 ප්‍රමාණයට හදන එක තමයි හොඳම දේ.

දැන් අපි බලමු ඕක Save කරන හැටි. ෆේස්බුක් එකේ කවර් ෆොටෝ එක Load වෙන්න ඒකත් බලපානවා.

අපි හදන නිර්මාණයේ resolution  එක 72ppi විදියට ගන්න. Color Mode එක sRGB කියන එක ‍තෝරන්න. 

අකුරු, ලෝගෝ නැත්නම් ඕක JPEG / JPG විදියට සේව් කරන්න. jpeg format options වලින් progressive කියන එක ‍තෝරන්න. Quality කියන එක වෙනස් කරලා ෆයිල් සයිස් එක 100-115 kb අතර වගේ ගාණකට එන්න ෆොටෝ එක save කරන්න.

අකුරු, ලෝගෝ එහෙම තියෙනවා නම් jpeg නෙමෙයි ඕක save කරන්න ඕන png විදියට. PNG විදියට සේව් කරන්න ගියාම එන png options වල Interlace කියන එකේ Interlaced කියන ඔප්ෂන් එක සිලෙක්ට් කරලා OK කරන්න. ෆයිල් සයිස් එක 120kb ට අඩු වෙන එක තමයි හොඳම දේ.

ඔන්න ඔහොම තමයි ලස්සන ෆේස්බුක් කවර් ෆොටෝ එකක් හදාගන්නෙ. අලුතින් දෙයක් ඉගෙන ගත්තු අය කොමෙන්ට් එකක් දාගෙනම යන්නකෝ.

අපි කොච්චර මැසේජ් යැවුවත් කෙල්ලො රිප්ලයි කරන්නෙ නෑ

පිරිමි ළමයි ගොඩක් වෙලාවට කියන දෙයක් තමයි ගෑණු ළමයි ඔන්ලයින් හිටියට අපිත් එක්ක චැට් කරන්නෙ නෑනෙ කියන එක. "අපි කොච්චර හායි කිවුවත් උන් චැට් කරන්නෙ නෑ" ඔහොමනෙ කියන්නෙ. එහෙම වෙන්නෙ ඇයි කියන එක ගැනයි අද පෝස්ට් එක.

ඒකට එක හේතුවක් තමයි තමන් "පොෂ්" කියල හිතාගෙන ඉන්න "පුස්" කෙල්ලො පොළවට අඩි 7-8ක් උඩින් ඇවිදින එක. බිම ඉන්න අයව උන්ට එතකොට පේන්නෙ නෑ. ලොකු "බෙන්ස්" එකක එන සෝබනකාරයන්ව විතරයි මේ "පුස්" කෙල්ලන්ට පේන්නෙ. සමහරු හිතන්නෙ තමන්ට "හායි" කියල මැසේජ් එකක් එවන එක මහ‍රැජිනට අත්මේස් නැතුව අතට අත දෙන එක තරම්ම ගෞරවයක් කියල. 

මෙහෙම වෙන්න ලොකුම හේතුව තමයි කොල්ලන්ගෙම වැරදි. ( දැන් ඉතිං මට බනින්නෙපා. මේ කියන්නෙ හැමෝටම නෙමෙයි. සමහරු කරන වැරදි නිසා හැමෝටම වෙන දෙයක් තමයි. ගිණිපෙනෙල්ලෙන් බැට කාපු කෙනා කණාමැදිරියටත් බයයිලුනෙ. එක එක අසහනකාරයන්ගෙන් බැට කාපු ගෑණු ළමයි ෆේස්බුක් ඉන්න කොල්ලො සේරටම සලකන්නෙ ඒ විදියට. ඒකත් එක අතකින් සාධාරණයි. කාව විශ්වාස කරන්නද කියලා හිතාගන්න බෑ මේ සයිබර් ලෝකයේ. කාවවත් විශ්වාස නොකර ඉන්න එක තමයි හොඳම දේ.

කොල්ලනේ, මෙන්න මේ වැරදි ටික හදාගන්න පුලුවන් නම්, ෆේස්බුක් එක මීට වඩා ගොඩක් යහපත් හොඳ තැනක් කරන්න පුලුවන් බං. සිරාවටම.

1. කොල්ලන්ට මැසෙන්ජර් දුන්නා කියන්නෙ වඳුරට දැලිපිහිය අහු වුණාට හපන්. ගෑණු ළමයි හෝ මොනයම්ම කෙනෙක් කැමති නම් විතරක් කෝල් කරන්න. වදයක් වෙන්න යන්න එපා කාටවත්.

2. කියන හැම එකටම "ඇයි ඒ? ඇයි ඒ?" ගාන්න යන්නෙපා.
          කෑවද? නෑ. ඇයි ඒ?
          ජොබ් එකක් කරනවද? නෑ. ඇයි ඒ?
          මොනවද කෑවෙ? පාන්. ඇයි ඒ?
          දොයි මතද? නෑ. ඇයි ඒ?

3. පොඩි කාලෙ හුරතල් වෙන්න බැරි වෙච්චි තොත්ත බබාලා  වගේ හැසිරෙන්න එපා.
"බයි කෑවද? දොයියමුද? හලි වැඩේ. ‍තෝයි. මාලයි. තූති මනික..."
මේවට කැමති වෙන්න නම් ඉතිං අර මානසික රෝහලේ ගෑණු වාට්‍ටුවක ඉන්න කෙනෙක් වෙන්න ඕන.

4. තමන්ගෙ ලිංගික අවයව ගෑණු ළමයින්ට inbox එවන්න එපා. ඒවට කැමති ගණිකාවොත් ඇති. එහෙම අයට යැව්වට අපි මොකුත් කියන්නෙ නෑ. අහිංසක කෙල්ලන්ට කොල්ලන්ට ජරාව එවන්න එපා. ඒවා එයාලගෙන් ඉල්ලන්නත් එපා.
ඕවයෙන් පේන්නෙ ඉතිං දෙමව්පියන්ගෙ හැටි තමයි. තාත්තා ගෙදර නැති වෙලාවට වෙන මිනිස්සු ගෙදරට ගෙන්න ගන්න අම්මෙක්ගෙ පුතාලා දූලා ඔහොම වෙන එකේ පුදුමයක් නෑ.

5. චැට් කරන්න කලින් චැට් කරන කෙනාගෙ ප්‍රොෆයිල් එකේ විස්තර ටිකක් බලන්න පුරුදු වෙන්න. ගොඩක් වෙලාවට ගම, වයස, පාසල වගේ දේවල් දාලා තියෙන්නෙ හැමෝම වගේ. ඒවා කිසි දෙයක් නොබලා ගෑණු ළමයෙක්ගෙ නම ඉස්සරහින් කොළ පාට බෝලයක් තියෙනවා දැකපු ගමන් "හායි. ඔයා කොහෙද? වයස කීයද? මොකද කරන්නෙ?.... " ඔහොම දේවල් අදත් අහලා හෙටත් අහලා අනිද්දටත් අහනකොට ඒ ළමයින්ට එපා වෙන එකේ පුදුමයක් නෑ. ඕක මහ කැත පුරුද්දක්. අත අරින්න පුලුවන් නම් හොඳයි. 

6. චැට් කරද්දි උණත් අනවශ්‍ය දේවල් අහන්න යන්න එපා. දවල්ට කාපු වෙලාවයි කාපු බත් එකේ තිබුණ ගල්කැට ගාණයි කාලා වතුර උගුරු කීයක් බිවුවද කියලයි නානකොට ගාපු සබන් වර්ගෙයි....පිළිකුල්... චාටර්...

7. චැට් කරන පළවෙනි පැය බාගෙදිම කෙල්ලන්ගෙ ෆොටෝ ඉල්ලන්නෙපා. කෙල්ලනේ. දෙන්නත් එපා. එඩිට් කරන එක, එඩිට් කරලා ඉන්ටනෙට් දාන එක වගේම් බ්ලැක්මේල් කරන එකත් අද කාලෙ සුළු දෙයක්. කාව විශ්වාස කරන්නද කියල හිතාගන්න බැරි නිසාම කාටවත් එක පාරට ෆොටෝස්, ෆෝන් නම්බර්ස් දෙන්න එපා.
කොල්ලනේ, කෙල්ලෙක් හායි කියපු ගමන් ඒකිගේ වයිබර්, වට්ස් ඇප්, ෆෝන් නම්බර්ස්, ෆොටස් ඉල්ලන්නෙපා. මිනිස්සුන්ට විතරක් නෙමෙයි සත්තුන්ටත් එපා වෙනවා.
කෙල්ලනේ, ෂෝයි  අයියා කෙනෙක් චැට් කරලා "නංගී, ඔයාගෙ ෆොටෝ එකක් එවන්න. මම අනිත් අය වගේ නෙමෙයි. මම කාටවත් පෙන්වන්නෙ නෑ. බලපු ගමන් ඩිලීට් කරනවා/ කපලා දානවා" කියපු ගමන් එළදෙන්නු වගේ ෆොටෝ යවන්නත් එපා. කුස්සියේදියි බාත් රූම් එකේදියි බස් හෝල්ට් එකේදියි හැමතැනම හැම වෙලේම සෙල්‍ෆි ගගහා ෆේස්බුක් දාන්නත් එපා. එතකොට අනිත් අයට හිතෙන්නෙ පිටකො‍ටුවෙ සමනළියක් කියලා.

ඔය මදැයි. මේ ගැන තව කතා කරමු ඉස්සරහට. මේ පෝස්ට් එක ගැන හිතෙන දේවල් (යෝජනා, චෝදනා) මෙතන කොමෙන්ට් කරන්න. (ෆේස්බුක් ගැන කරන බ්ලොග් එකක් නිසා කොමෙන්ට් දාන්න හදලා තියෙන්නෙත් Google හෝ සාමාන්‍ය බ්ලොග් එකක කොමෙන්ට් දාන විදියට නෙමෙයි හොඳේ. ෆේස්බුක් එකට දැන් ලොග් වෙලා ඉන්න ෆේස්බුක් සාමාජිකයෙක් වෙන්න ඕන. කොමෙන්ට් එක පෝස්ට් වෙන්නෙ ෆේස්බුක් හරහා.)

ෆේස්බුක් සඳහා සුවිශේෂී පාස්වර්ඩ් එකක් නිර්මාණය කරගැනීම

කලින් පෝස්ට් එකේදි කිවුවා හොඳ පාස්වර්ඩ් එකක් නිර්මාණය කරගන්න සරල ක්‍රමයක්. තවත් ක්‍රමයක් තමයි ඒ වෙනුවෙන්ම සැකසූ මෘදුකාංගයක් භාවිතයෙන් පාස්වර්ඩ් එකක් නිර්මාණය කරගන්න එක. මේ කියන්න යන්නෙ iObit කියන ප්‍රසිද්ධ කොම්පැණියෙන් නිපදවන Random Password Generator කියන මෘදුකාංගය ගැන. ඒකෙ ප්‍රමාණය 1.85 MB පමණයි. ‍ෆ්‍රී සොෆ්ට්වෙයා එකක්. මුලින්ම ඒක මෙතනින් ඩවුන්ලෝඩ් කරගන්න. ඊට පස්සෙ ඉන්ස්ටෝල් කරගෙන පළවෙනි වතාවට ඕපන් කරද්දි මෙහෙම එකක් එයි.

මේක තම්යි ඔයාලා මේ සොෆ්ට්වෙයා එක ඉන්ස්ටෝල් කරද්දි දෙන්න ඕන මාස්ටර් පාස්වර්ඩ් එක. ඒ ඕන වෙන්නෙ මේ සොෆ්ට්වෙයා එක ඕපන් කරන්න විතරයි. කලින් පෝස්ට් එකේ කියපු විදියට හදාගත්තු පාස්වර්ඩ් එකක් මෙතනට දීලා OK කරන්න.
ඊට පස්සෙ ඔයාලට එයි මෙන්න මේ විදියෙ ඩයලොග් බොක්ස් එකක්. ඔයාලගෙ පාස්වර්ඩ් එකට ඔයාලට අවශ්‍ය characters ගැන විස්තර සහ පාස්වර්ඩ් සංඛ්‍යාව මෙතනින් ‍තෝරලා Create Password(s) ක්ලික් කරන්න.

දැන් ඔන්න අපිට හිතාගන්නවත් බැරි විදියේ පාස්වර්ඩ් එකක් හැදිලා තියෙනවා. ඒකට ඔයා සතු‍ටුදායක නැත්නම් Regenerate කියන එක ඔබන්න. ඔබට සතු‍ටුයි නම් දැන් ඒ හැදුන පාස්වර්ඩ් එක select කරලා Copy කියන එක ඔබන්න. (පහත රූපය)

මගේ පෞද්ගලික අදහස තමයි මේ නිර්මාණය වන පාස්වර්ඩ් ඔයා Notepad ෆයිල් එකක සේව් කරලා තියාගන්න ඔයා ඕක පාවිච්චි කරන්නෙ මොකක් සඳහාද කියන එකත් එක්ක.
උදා:         45+/fgD^?0K,pl                               Facebook
                qwee(89>00ll@rt67                         Gmail

මේ සොෆ්ට්වෙයා එකේමත් තියෙනවා ඔය විදියට සේව් කරලා තියාගන්න තැනක්. කැමති නම ඒක පාවිච්චි කරන්නත් පුලුවන්. ඒ කොහොම උනත් ඔයා වෙනම text ෆයිල් එකක සේව් කරලා තියාගන්න එක තමයි හොඳම දේ.
මේකේ තියෙන පහසුකමත් ඔන්න ඔහේ පාවිච්චි කරනවා නම්, පාස්වර්ඩ් එක කොපි කරගත්තට පස්සෙ යන්න ඔය උඩින් තියෙන Password Manager කියන ටැබ් එකට. එතන ඔයා හදාගත්තු පාස්වර්ඩ් එක ඇති. ඒක උඩ ඩබල් ක්ලික් කලාම එන ඩයලොග් බොක්ස් එකේ ID කියන තැනට Facebook, Twitter, Gmail, Outlook වගේ ඔයා මේක පාවිච්චි කරන්න බලාපොරොත්තු වෙන එකවුන්ට් එකේ නම දාන්න. OK කරන්න.

ඔයාට වැදගත් වෙන පාස්වර්ඩ් බර ගාණක් මේ විදියට සේව් කරලා තියාගන්න පුලුවන්. කොහොම උණත් වෙනම text ෆයිල් එකක සේව් කරලා තියාගන්න එක හොඳායි. නැත්නම් හදිසියේ Windows අලුතෙන් දාන්න ඕන උනොත් එහෙම... ඔයා පවුනෙ. 

මේ සරල මෘදුකාංගය පාවිච්චි කරන්නෙ ඔන්න ඔය විදියට තමයි. ලේසියි. පහසුයි. සරලයි. සුගමයි.  කොමෙන්ට් දානවා නම් මෙතන පහලින් දාන්න. (ෆේස්බුක් ගැන කරන බ්ලොග් එකක් නිසා කොමෙන්ට් දාන්න හදලා තියෙන්නෙත් Google හෝ සාමාන්‍ය බ්ලොග් එකක කොමෙන්ට් දාන විදියට නෙමෙයි හොඳේ. ෆේස්බුක් එකට දැන් ලොග් වෙලා ඉන්න ෆේස්බුක් සාමාජිකයෙක් වෙන්න ඕන. කොමෙන්ට් එක පෝස්ට් වෙන්නෙ ෆේස්බුක් හරහා.)

පළවෙනි පෝස්ට් එක - ෆේස්බුක් වෙත සාදරයෙන් පිළිගනිමු හිටං

බ්ලොග් එකේ පළමුවෙනි පෝස්ට් එක. ෆේස්බුක් කියන්නෙ මොකක්ද කියල මම ඔයාලට අඳුන්වලා දෙන්න ඕන නෑනෙ. පරණ යාලුකම් හදාගන්නත් අලුත් යාලුකම් ඇති කරගන්නත් අලුත් දෙයක් ඉගෙන ගන්නත් පවුලක් පන්සලක් වෙන්න පාට්නර් කෙනෙක් හොයාගන්නත් දේශපාලනේ අලුත්ම නිව්ස් දැනගන්නත් පාවිච්චි කරන ප්‍රධානම මාධ්‍යය තමයි ෆේස්බුක්, නැත්නම් මූණුපොත.
කොම්පියුටරයක්, ලැප් එකක්, ටැබ් එකක්. ෆෝන් එකක්, ඉන්ටනෙට් යන්න පුලුවන් ඕනම අටමගලයක් අරන් www.facebook.com කියන වෙබ් URL එක ගහලා ෆේස්බුක් වලට යන්න පුලුවන්. දැනටමත් සාමාජික නම් ඔයාගේ username, password ගහලත් එහෙම නැත්නම් අලුතින් සාමාජික වෙන ෆෝම් එක පුරවලත් ඔයාට මේකට ලොග් වෙන්න පුලුවන්. 

ඔය පොල්ගෙඩි අකුරෙන් තියෙන්නෙ Create an Account කියල. එතනින් හදමු අලුත් එකවුන්ට් එකක්. First Name, Surname ඔයාගෙ නමේ කෑලි 2ක් ඔතනට දාන්න. ඒ දෙක තමයි ඔයාගෙ ෆේස්බුක් එකවුන්ට් එකේ / ප්‍රොෆයිල් එකේ නම කියලා පෙන්වන්නෙ. එක පාරක් වෙනස් කලාම දවස් 60කින් තමයි ආපහු වෙනස් කරන්න පුලුවන් ඕක.
Email or Phone Number ඊමේල් ඇඩ්‍රස් එක හරි ෆෝන් නම්බර් එක හරි ඔතනට දාන්න. ඔතනට ෆෝන් නම්බර් එක දැම්මොත්, ඒ සිම් එක අනිවාර්යයෙන් ළඟ තියෙන්න ඕන. ඊමේල් ඇඩ්‍රස් එක දැම්මොත්, ඒකට ඕනම මොහොතක ලොග් වෙන්න හැකියාව තියෙන්න ඕන.
ඊට පස්සෙ පාස්වර්ඩ් එක. පාස්වර්ඩ් එකක් දානකොට මතක තියාගන්න ඕන කරුණු කීපයක් තියෙනවා.
1. ඊමේල් එකෙයි ෆේස්බුක් එකෙයි එකම පාස්වර්ඩ් එක දාන්නෙපා.
2. පාස්වර්ඩ් එකට උපන්දින, ගම, රට වගේ හැමෝටම හිතාගන්න පුලුවන් ඒවා දාන්නෙපා.
3. කාටවත් හිතන්න බැරි වෙනස් එකක් දාමු.
උදා :- 

මම ආසම ළමා ගීතය "රන් රඹුටන් ගස් දෙකයි වලි කුකුලෝ පස් දෙනයි - Ran Rambutan Gas 2yi Wali Kukuloa 5 Dhenayi
ඒකේ මුල අකුරු ටික ගනිමු - RRG2WK5D
දෙවෙනි කෑල්ල සිම්පල් අකුරින් දාමු. එතකොට RRG2wk5d
කොහොමද පාස්වර්ඩ් එක. අමතක වෙන්නෙත් නෑනෙ.

මේ ගසේ බොහෝ.. සිංදුව දන්නවනෙ.      MGBpdtPHBNbwa
දිගු දෑස දු‍ටුවාම - හැ‍ඟෙනවා පේර සේම    dddHPSuhmgOHA

පාස්වර්ඩ් හදන්න සරල, ඒත් නිවැරදි පුංචි ක්‍රමයක් ඕක.
මතක ඇතුව පාස්වර්ඩ් එක Capslock බලලා හරියට ටයිප් කරන්න. Double Check  කරන්න. මොකද අනෙකුත් බොහෝමයක් වෙබ්සයිට් වල වගේ ෆේස්බුක් වල Retype Password කියලා ඔප්ෂන් එකක් නෑ. ගැහුවොත් ගැහුවමයි. 

ඉතුරු ටික නම් දන්නවනෙ. උපන්දිනේ ගහන්න. ගැහැණු- පිරිමි බවත් ‍තෝරන්න. අද කාලේ පිරිමිත් ඔතනින් Female කියන එක ‍තෝරන බව කෙල්ලො හිතේ තියාගන්න ඕන ඈ... අලුත් සමනළ පරපුරේ කෙනෙක් උනත් කමක් නෑ. උප්පැන්න සහතිකේ තියෙන එක ඔතනින් ‍තෝරලා Create an Account බට්න් එක ඔබන්න. ඔන්න ඔයාගෙ ෆේස්බුක් එකවුන්ට් එක 50%ක් හරි.

අන්තිමට තව පොඩි දෙයක් කරන්න තියෙනවා,

ඕක හදද්දි ගැහුවෙ ෆෝන් නම්බර් එක නම් ෆෝන් එකට එන කෝඩ් එකට ටයිප් කරන්න කියයි. ඊමේල් එකක් දැම්මා නම් ඒකට එන ලින්ක් එක ක්ලික් කරන්න කියාවි. ඒකත් කරන්න, දැන් වැඩේ ගොඩක්. ඔයත් බුකියේ...!

කොමෙන්ට් ටික මෙතනම දාමුකො බලන්න

(ෆේස්බුක් ගැන කරන බ්ලොග් එකක් නිසා කොමෙන්ට් දාන්න හදලා තියෙන්නෙත් Google හෝ සාමාන්‍ය බ්ලොග් එකක කොමෙන්ට් දාන විදියට නෙමෙයි හොඳේ. ෆේස්බුක් එකට දැන් ලොග් වෙලා ඉන්න ෆේස්බුක් සාමාජිකයෙක් වෙන්න ඕන. කොමෙන්ට් එක පෝස්ට් වෙන්නෙ ෆේස්බුක් හරහා.)